Lungnateymi

Læknir sækir um lungnaendurhæfingu á Reykjalundi.

Yfirlæknir lungnasviðs og hjúkrunarstjóri fara yfir allar beiðnir sem koma til lungnasviðs og meta hvort líklegt sé að lungnaendurhæfing muni gagnast viðkomandi.

Fljótlega eftir að beiðni berst á lungnasvið hringir hjúkrunarstjóri í sjúklinginn, kannar heilsu hans og áhugahvöt til endurhæfingar, veitir upplýsingar um ferli endurhæfingarmats, en matið er forsenda lungnaendurhæfingar á Reykjalundi.

Sjúklingur fær boðun í skráningarmiðstöð Reykjalundar samhliða boðun í endurhæfingarmat.  Bókunarupplýsingar o.fl. er sent gegnum Heilsuveru.

Endurhæfingarmat er þverfaglegt mat lungnateymis á getu sjúklings, áhuga og vilja til að taka á heilsuvanda sínum með aðstoð fagfólks. Endurhæfingarmat á lungnasviði er tveggja daga ferli; tekin eru viðtöl, gert þolpróf og eftir atvikum önnur lífeðlisfræðileg próf.

Í lok endurhæfingarmats er ákveðið hvort innskrift í endurhæfingu henti viðkomandi, sem fær þá niðurstöðu með símtali.

Sé boðið upp á endurhæfingardvöl, er markmiðið að hún hefjist innan þriggja mánaða frá því að mati lauk. Þyki lungnaendurhæfing á Reykjalundi ekki fýsilegur kostur, er leitað annarra úrræða.

Um það bil fjórum dögum fyrir áætlaða innskrift á dagdeild lungna hringir hjúkrunarfræðingur í sjúkling til að staðfesta boðun og veitir upplýsingum um hagnýt atriði varðandi endurhæfinguna og nákvæma tímasetningu mætingar.

Meðferð á lungnasviði nær að öllu jöfnu yfir 4-6 vikna tímabil.

Eftirfylgd er einstaklingsbundin og fer eftir þörfum hvers og eins.