Frétt

19.09.2019

Verkefni á Reykjalundi fær stóran styrk frá Rannís

Reykjalundur, endurhæfingarstofnun SÍBS, hefur í samstarfi við Matís, Háskóla Íslands og Primex ehf hlotið 45 milljóna styrk úr Tækniþróunarsjóði Rannís til að rannsaka áhrif lífstílsbreytinga með og án inntöku trefjaefnisins kítósans á þarmaflóru. Heiti verkefnisins er MicroFIBERgut: Áhrif trefjaefnisins kítósans á þarmaflóru og þyngdarstjórnun.

Offita er meðal alvarlegustu heilsufarsvanda nútímans þar sem m.a. sykursýki, hjarta- og æðasjúkdómar eru algengir fylgiskvillar. Ávinningur meðferðar við offitu er því augljós. Kítosantrefjar unnar úr rækjuskel binda fitu í meltingarvegi og minnka upptöku hennar. Vísbendingar eru fyrir því að kítósan hafi jákvæð áhrif á meltingu og þarmaflóru. Markmið MicroFIBERgut er að fá betri skilning á því hvort og hvernig kítósan hefur áhrif á meltingu, þyngd og heilsufar einstaklinga. Rannsökuð verða áhrif mismunandi meðferða (lífsstílsbreytinga eða óbreyttur lífstíll með og án inntöku á kítósani) á ýmsar heilsufarstengdar breytur á tvö mismunandi þýði, annars vegar sjúklinga í meðferð á offitu- eða gigtarsvið Reykjalundar og hins vegar heilbrigðan samanburðarhóp. Áhersla verður lögð á greiningu þarmaflóru þar sem fjöldi rannsókna hafa sýnt að örverur hafa áhrif á heilsu og þróun sjúkdóma. Með heildrænni og nýrri nálgun mun verkefnið auka þekkingu til þróunar á nýjum vörum og þjónustu til heilsubótar.

Ábyrgðarmaður verkefnisins á Reykjalundi er Dr. Marta Guðjónsdóttir, rannsóknastjóri.

Á myndinni hér fyrir neðan er rannsóknarhópurinn á „kick-off“ fundi 3. september 2019. Talið frá vinstri: Hildur, Viggó, Alexandra, Marta, Hélène og Sigurlaug (verkefnisstjóri MicroFIBERgut). Á myndina vantar Ingólf og Hjördísi frá Reykjalundi, Þórhall frá H.Í. og Stephen frá Matís.

Til baka