Geðheilsuteymi

Hjá geðheilsuteymi fer fram endurhæfing vegna þunglyndis og kvíða, en oft er þó um fjölþætt vandamál að ræða, þ.e. líkamleg, andleg og félagsleg.

Endurhæfing er hluti af bataferlinu og ber einstaklingurinn sjálfur ábyrgð á að fylgja henni eftir meðan á dvöl stendur.

Símatími geðheilsuteymis er á miðvikudögum kl. 09:30 – 10:30. Þar má fá upplýsingar varðandi biðlista og/eða koma á framfæri upplýsingum sem gætu skipt máli varðandi endurhæfinguna.

Beiðni þarf að berast frá lækni. Mikilvægt er að þar komi fram ítarlegar upplýsingar um hvað leggja þurfi áherslu á í endurhæfingunni og hvernig hefur verið tekist á við vanda einstaklingsins áður.

Bið eftir endurhæfingu getur verið allt að einu ári. Til geðheilsuteymis berast margar beiðnir og því miður er ekki hægt að sinna þeim öllum. Ef ekki næst að sinna beiðni innan árs, fellur hún  af biðlistanum. Nauðsynlegt er að senda nýja beiðni ef enn er þörf fyrir endurhæfingu.

Lengd dvalar er að jafnaði fjórar til sex vikur. Flestir eru á dagdeild frá kl. 8:00 til 16:00 virka daga. Einnig er hægt er að fá gistingu á staðnum ef þörf er á, t.d. ef fólk er utan af landi.

Aðstaða geðheilsuteymis er á annarri hæð (gangur C-2). Þar er móttaka og vakt frá mánudegi til fimmtudags milli kl. 08:00 og 18:00 og á föstudögum milli kl. 08:00 og 15:00.  Auk þess eru þar setustofa, hvíldar- og viðtalsherbergi.

Notkun tóbaks á Reykjalundi og á lóð staðarins er ekki leyfileg. Hægt er að fá stuðning á göngudeild Reykjalundur til að hætta að reykja fyrir innskrift.

Þörf fyrir endurhæfingu er metin út frá þeim upplýsingum sem fylgja beiðni og því er mikilvægt að þær séu greinargóðar. Við forgangsröðun koma ýmis atriði til álita s.s. aldur, þátttaka í samfélaginu, hvaða meðferð hefur verið reynd og hvernig hún hefur gengið. Lögð er áhersla á að sem flestir á biðlistanum fái tækifæri til að nýta sér endurhæfingu á Reykjalundi og því hafa þeir forgang sem ekki hafa komið til meðferðar áður.

Vegna forgangsröðunar getur biðin eftir því að komast að verið mislöng.