Ráð og nefndir

Á Reykjalundi er starfandi fagráð. Fagráð starfar samkvæmt 13. gr. í lögum um heilbrigðisþjónustu frá árinu 2007. Þar segir að fagráð “skulu vera forstjóra og framkvæmdastjórn til ráðuneytis um fagleg atriði í rekstri heilbrigðisstofnunar. Ber að leita álits fagráða um mikilvægar ákvarðanir sem varða heilbrigðisþjónustu stofnunarinnar.“

Skipan fagráðs og starfshættir:
Í fagráði eiga sæti með fullum réttindum fulltrúar allra heilbrigðisstétta sbr. lög nr. 40 frá 27. mars 2007, auk annarra fagstétta sem koma beint að endurhæfingu sjúklinga á Reykjalundi.

Hver fagstétt tilnefnir eða kýs einn fulltrúa í fagráð. Í fagráði sitja fulltrúar frá eftirtöldum fagstéttum: Félagsráðgjöfum, heilsuþjálfurum, hjúkrunarfræðingum, iðjuþjálfum, læknum, næringarfræðingum, sálfræðingum, sjúkraliðum, sjúkraþjálfurum og talmeinafræðingum. Fagráð fundar að jafnaði einu sinni í mánuði nema yfir sumartímann.

Fagstjórn er skipað fagstjórum eftirtalinna heilbrigðisstétta: félagsráðgjafa, iðjuþjálfa, næringarráðgjafa, sálfræðinga, sjúkraþjálfara, talmeinafræðinga og íþróttafræðinga auk framkvæmdastjóra hjúkrunar og framkvæmdastjóra lækninga.
Fagstjórn skal funda mánaðarlega á tímabilinu september til maí og oftar ef ástæða er til og ársfjórðungslega með framkvæmdastjórn og framkvæmdastjórum sviða auk rannsóknarstjóra, gæðastjóra og mannauðsstjóra.
Fagstjórn skal vera framkvæmdastjórn til ráðgjafar um þjónustu, starfsemi og rekstur Reykjalundar. Einu sinni á ári skal fagstjórn fjalla um drög að fjárhagsáætlun Reykjalundar og einu sinni á ári skal fagstjórn taka gæðamál og árangursmælikvarða til umfjöllunar.
Fagstjórn skal árlega boðað til fundar þar sem gildandi stefna Reykjalundar er til umfjöllunnar. Sami starfsmaður situr ekki á sama tíma í fagráði og fagstjórn.

Hjúkrunarráð Reykjalundar var stofnað 2006 en í því eru allir hjúkrunarfræðingar sem eru í föstu starfi á Reykjalundi.

Hlutverk hjúkrunarráðs er:

  • Að vera faglegur ráðgefandi vettvangur fyrir hjúkrunarfræðinga og stjórnendur Reykjalundar.
  • Að eiga frumkvæði að og vera vettvangur umræðna um endurhæfingarhjúkrun, innan stofnunar og utan. Hjúkrunarráð hvetur til þess að hjúkrun á Reykjalundi sé byggð á gagnreyndri þekkingu þar sem markmiðið er að veita árangursríka endurhæfingarhjúkrun.
  • Að taka þátt í þróunarvinnu innan Reykjalundar meðal annars með því að hvetja til “klíniskra” rannsókna í hjúkrun og góðra tengsla við menntastofnanir í heilbrigðisfræðum.
  • Að vera til ráðuneytis varðandi fagleg málefni hjúkrunarfræðinga, rekstur, stjórnun, uppbyggingu og nýtingu stofnunarinnar.
  • Að vera  stjórnendum heilbrigðismála utan stofnunarinnar til ráðuneytis sé eftir því leitað.

Á Reykjalundi hefur verið starfandi læknaráð frá árinu 1974. Samkvæmt lögum um heilbrigðisþjónustu frá 2007 skal læknaráð vera forstjóra og framkvæmdastjórn til ráðuneytis um fagleg atriði í rekstri stofnunarinnar. Einnig ber að leita álits læknaráðs um mikilvægar ákvarðanir sem varða læknisfræðileg atriði í heilbrigðisþjónustu Reykjalundar.

Í læknaráðinu eiga sæti allir starfandi læknar á Reykjalundi. Læknaráð fundar að jafnaði einu sinni í mánuði, en oftar ef ástæða er til þess. Helstu verkefni sem það tekur fyrir eru til dæmis gæði þjónustu á Reykjalundi, skipulagsmál stofnunarinnar, stöðuveitingar, fræðslumál og lyfjamál, svo nokkuð sé nefnt.

Hlutverk vísindaráðs er:

  • Að vera stjórn og stjórnendum Reykjalundar ráðgefandi um vísindastefnu stofnunarinnar.
  • Að vinna náið með rannsóknarstjóra að framgangi vísindastefnunnar.
  • Að vinna að formlegum tengslum og samstarfi við aðrar stofnanir, innanlands og utan.
  • Að leggja faglegt mat á allar umsóknir um styrki úr vísindasjóði og skila áliti til framkvæmdastjórnar.
  • Að gæta samræmis í þeim matstækjum sem notuð eru á stofnuninni og vera ráðgefandi um stöðluð vinnubrögð við beitingu þeirra.
Samkvæmt reglum um rannsóknir á Reykjalundi skal þriggja manna vísindaráð skipað af framkvæmdastjórn á fyrsta ársfjórðungi hvers árs samkvæmt tilnefningu starfsmanna að undangenginni auglýsingu. Einn gengur úr ráðinu á hverju ári og nýr kemur inn. Hver vísindaráðsmaður situr þannig þrjú ár í ráðinu og gegnir formennsku síðasta árið. Vísindaráð skal vera þverfaglegt og jafnræðis gætt milli faghópa við skipan í ráðið. Rannsóknastjóri RL er fundarritari vísindaráðsfunda og kemur einnig að öðrum verkefnum í ráðinu.

Lyfjanefnd starfar á Reykjalundi samkvæmt 40. gr. lyfjalaga nr. 93/1994 með áorðnum breytingum.

Hlutverk nefndarinnar er að vera ráðgefandi um lyfjaval, hafa eftirlit og yfirlit yfir lyfjanotkun á Reykjalundi, gefa út lyfjalista fyrir stofnunina, gefa út leiðbeiningar um notkun lyfja í ákveðnum og völdum tilfellum og koma með ábendingar um það sem betur mætti fara í lyfjamálum. Nýskráð lyf eða lyf sem ekki eru á lyfjalista má ekki taka í notkun nema að fengnu leyfi lyfjanefndar. Þess skal gætt þegar völ er á fleiri en einu lyfi að velja til notkunar á heilbrigðisstofnunum þau lyf sem ódýrari eru að teknu tilliti til virkni, gæða og öryggis.

Skipan lyfjanefndar Framkvæmdastjóri lækninga skipar þriggja manna lyfjanefnd að fenginni tilnefningu um nefndarmann frá framkvæmdastjóra hjúkrunar.  Framkvæmdastjóri lækninga skipar einnig formann nefndarinnar. Skal að minnsta kosti einn starfandi lækna Reykjalundar og einn starfandi lyfjafræðingur í þjónustu við Reykjalund vera í nefndinni.

Lyfjanefnd skipa:
  • Magdalena Ásgeirsdóttir læknir
  • Jónína Salóme Jónsdóttir lyfjafræðingur, forstöðumaður apóteks
  • Jónína Sigurgeirsdóttir hjúkrunarfræðingur, gæðastjóri
Öryggisnefnd Reykjalundar starfar samkvæmt lögum um vinnuvernd nr. 46/1980 sem fjalla um aðbúnað, hollustuhætti og öryggi á vinnustöðum. Þar segir meðal annars:

"Í fyrirtækjum, þar sem eru 50 starfsmenn eða fleiri, skal stofna öryggisnefnd. Starfsmenn kjósa úr sínum hópi tvo fulltrúa og atvinnurekandi tilnefnir tvo fulltrúa. Þessi nefnd skal skipuleggja aðgerðir varðandi aðbúnað, hollustuhætti og öryggi innan fyrirtækisins, annast fræðslu starfsmanna um þessi efni og hafa eftirlit á vinnustöðum með því, að ráðstafanir er varða aðbúnað, hollustuhætti og öryggi komi að tilætluðum notum." (6. gr.)

Öryggisnefnd Reykjalundar er þannig skipuð:

Öryggisverðir tilnefndir af framkvæmdastjórn:

  • Magnús Pálsson, félagsráðgjafi, formaður öryggisnefndar
  • Helgi Kristjónsson, fjármálastjóri

Öryggistrúnaðarmenn tilnefndir af starfsmönnum:

  • Gunnhildur Gísladóttir, iðjuþjálfi, ritari öryggisnefndar
  • Magnús R. Jónasson, læknir
Síðustu ár hefur öryggisnefndin unnið að áhættumati og viðbragðsáætlunum á einstökum vinnustöðvum og áhættumati og viðbragðsáætlun vegna eineltis. Fundir hafa verið haldnir eftir þörfum yfir árið og verið á tímabilum vikulegir, vegna þessara verkefna.