Þjálfun og hreyfing

Heilsubætandi þjálfun
Gangan

Öll dagleg hreyfing er til góðs. Til þess að ná heilsubætandi áhrifum þá er mælt með að fullorðinn einstaklingur hreyfi sig í að minnsta kosti 30 mínútur daglega, samfellt eða samanlagt til dæmis 10-15 mínútur í senn. Öll viðbótarhreyfing yfir daginn skiptir máli til dæmis að ganga stiga í staðinn fyrir að taka lyftuna, ganga styttri vegalengdir í stað þess að nota bílinn og vinna í garðinum.

Þolþjálfun

Þolþjálfun hefur áhrif á afkastagetu hjartavöðvans og nýtingu súrefnis í líkamanum sem leiðir til þess að þolið eykst. Einnig hefur þolþjálfun jákvæð áhrif á marga af áhættuþáttum kransæðasjúkdóma. Til þess að auka þol þarf að þjálfa 4-5 sinnum í viku, 40-60 mínútur í senn. Ákefðin þarf að samsvara 13-15 á Borg skala eða vera það mikil að maður hitni vel, jafnvel svitni og finni fyrir léttri mæði en ekki meiri en svo að hægt sé að spjalla!
Álagið á að vera hæfilega erfitt og aldrei skal finna til vanlíðunar meðan þjálfað er.
Í þolþjálfun þarf að velja hreyfingu þar sem stórir vöðvahópar eru notaðir og getur það verið ganga, sund, hjólreiðar, dans og fleira.
Einstaklingsbundið er hvaða hreyfing hentar hverjum og einum. Mikilvægt er að velja hreyfingu sem veitir ánægju og hægt er að hugsa sér að halda áfram að stunda.

Styrkþjálfun

Styrkþjálfun eykur styrk vöðva. Til að auka styrk þarf að nota þyngdir eins og til dæmis lóð, eigin líkamsþunga, teygjur eða æfingar í tækjum. Þjálfunin hefur fyrst og fremst áhrif á þann vöðvahóp sem þjálfaður er hverju sinni. Góður styrkur er ekki síst mikilvægur til þess að viðhalda góðri líkamlegri færni. Mikilvægt er að styrkþjálfun sé alltaf einstaklingsmiðuð og farið sé eftir leiðbeiningum fagfólks.
Ákefðin á ekki að vera meiri en sem samsvarar um það bil 13 á Borg skala.