Er árs bið eftir endurhæfingu fyrir fólk með parkinsonsveiki?
Ástæða þessarar hugleiðingar er fyrirsögn fréttar Sjónvarpsins sunnudaginn 25. september síðastliðinn, að fólk með parkinsonsveiki þyrfti að bíða í ár eftir endurhæfingu. Í fréttinni er ekki minnst á þá aðila sem sjá um endurhæfingu þessa sjúklingahóps, en það er taugasvið Reykjalundar. Undirrituð hefur óskað eftir að fréttin verði leiðrétt en það hefur ekki gengið eftir.
Staða endurhæfingar parkinsonsveikra á Íslandi er sú að frá 1998 hefur hún farið fram með skipulögðum hætti á Reykjalundi. Samstarfsráð um endurhæfingu (vinnur eftir erindisbréfi ráðuneytisins) ályktaði árið 2001 að endurhæfing fólks með parkinsonsveiki yrði áframhaldið og byggð upp á Reykjalundi. Frá 1998 hafa um 170 manns komið á Reykjalund í Heilsueflingu fyrir fólk með parkisnonsveiki. Notað er orðið heilsuefling yfir þessa endurhæfingu til að leggja áherslu á mikilvægi þess að fólk taki ábyrgð á eigin heilsu og geri hvað það getur til að viðhalda og efla hana. Fólk með langvinna sjúkdóma þarf ekki síður en aðrir að taka ábyrgð á eigin heilsu og það veit þessi hópur fólks. Endurhæfingin á Reykjalundi felur í sér almenna fræðslu um sjúkdóminn og meðferð fylgieinkenna, gildi hreyfingar og virkni og þjálfun raddar. Einnig er litið yfir félagslega stöðu ef þörf er á og leiðbeint varðandi virkni og vinnu en það er lokatakmark í allri endurhæfingu. Á hverju ári hafa verið um 20-25 manns í frumendurhæfingu, sem þýðir að fólk er að koma í þessa meðferð í fyrsta sinn. Undanfarin ár hefur verið hægt að sinna flestum innan 6 mánaða. Ef fólk leitar hjálpar aftur með ný einkenni eða vandamál er reynt að leysa þau mál á göngudeild. Við sem vinnum í endurhæfingu sjáum fólk fara andlega og líkamlega hressara frá okkur og margir eru betur í stakk búnir að takast á við lífið.
Í umræðunni í dag um hátæknisjúkrahús fer lítið fyrir endurhæfingu. Fólk með langvinna sjúkdóma eða fatlanir þarf einnig sérhæfða meðferð og er því mikilvægt að nýta þá þekkingu sem er til staðar innan endurhæfingar í þágu þessara sjúklinga.
Ólöf H. Bjarnadóttir.
Yfirlæknir taugasviðs Reykjalundar.