Hæfingarsvið

Hæfing er ætluð einstaklingum með meðfædda eða snemma áunna fötlun. Hæfing á Reykjalundi á sér langa sögu og stöðugt er unnið að því að efla og þróa starfsemina. Lögð er áhersla á að sinna ungu fólki frá átján ára aldri sem statt er á tímamótum unglings- og fullorðinsára, svo og fötluðum einstaklingum sem vilja endurmeta stöðu sína og fá viðeigandi faglegan stuðning til að finna lífi sínu nýjan og betri farveg. 

Hæfingarteymi

Í hæfingarteymi er hópur fólks með mismunandi fagþekkingu sem vinnur út frá þjálfun og markmiðum hvers einstaklings. Markmið hæfingar eru að bæta og viðhalda andlegri, líkamlegri og félagslegri færni og auka lífsgæði. Áhersla er lögð á að efla einstaklinginn og styðja hann til þátttöku, virkni og aukinnar ábyrgðar á eigin heilsu. Einstaklingurinn vinnur að eigin markmiðum í samvinnu við þverfaglegt teymi fagaðila. Enn fremur er samvinna við aðstandendur og lykilmenn í þjónustukerfi umhverfis einstaklinginn afar mikilvæg. Endurhæfing fyrir ungt fólk með fötlun er í boði allt árið á Reykjalundi. Sjúklingar á hæfingarsviði koma í forskoðun á göngudeild í apríl fyrir hópmeðferð á sumrin. Í ár var í annað sinn boðið upp á þriggja vikna sumarhóp, þar sem áhersla var lögð á samskipti og þjálfun í hóp. Unnið var út frá þátttöku í daglegum verkefnum og hópastarfi sem gaf tækifæri til sjálfseflingar og því að uppgötva nýja færni og áhugasvið. Verkefnin geta verið tengd eigin umsjá, íþróttum, listsköpun, fræðslu og ferðalögum.

Ungt fólk

Endurhæfing fyrir ungt fólk með fötlun er í boði allt árið á Reykjalundi. Ár hvert er sérstaklega boðið upp á meðferð í hópum þar sem lögð er áhersla á samskipti og þjálfun. Unnið er út frá þátttöku í daglegum verkefnum og hópastarfi sem gefur tækifæri til sjálfseflingar og að uppgötva nýja færni og áhugasvið. Þessi verkefni geta verið tengd eigin umsjá, íþróttum, listsköpun, fræðslu og ferðalögum. 

Langvinnir vöðvasjúkdómar

Endurhæfing fólks með langvinna vöðvasjúkdóma hefur flokkast undir hæfingarsvið. Undanfarið hafa innlagnir hjá fólki með spennuvisnun (myotonica dystrophia) verið skipulagðar og samfara unnið að skipulegri skráningu. Upplýsingasöfnun er í formi spurningalista með þverfaglegri sýn  á einkenni, sem gefur ágæta heildarmynd af heilsu. Einnig hafa mælitæki verið skilgreind og notkun þeirra stöðluð. Ráðgert er að nýta þessar upplýsingar til að fá betri mynd af vanda fólks með spennuvisnun og til að bjóða þessum sjúklingahópi sérhæfða eftirfylgd á hentugu þjónustustigi.

Beiðni

Læknar senda beiðni um hæfingu á Reykjalundi og beiðnir um þátttöku í sumarhópum þurfa að berast fyrir 15. mars. Forviðtal á göngudeild vegna sumarhópa fer fram í apríl og tilgangur þess er að veita og afla upplýsinga, meta aðstæður hvers og eins og ræða markmið og samstarf. Hver hópur dvelur á Reykjalundi í þrjár vikur. Ef í ljós koma verkefni er þarfnast ítarlegra mats eða meðferðar er mögulegt að veita þjónustu á göngudeild.